Mesta fjölgun ríkisstarfa á Suðurlandi – samt með lægsta hlutfall stöðugilda

Mesta fjölgun ríkisstarfa á Suðurlandi – samt með lægsta hlutfall stöðugilda

Á nýliðnu ári varð mesta fjölgun ríkisstarfa á landinu öllu á Suðurlandi. Samkvæmt nýrri skýrslu Byggðastofnunar um staðsetningu stöðugilda á vegum ríkisins bættust 79 ný störf við í landshlutanum á milli áranna 2024 og 2025, sem jafngildir 4,4% vexti.

Stór hluti fjölgunarinnar  í Árborg og Uppsveitum

Vöxturinn á Suðurlandi er drifinn áfram af uppbyggingu á grunnþjónustu landshlutans. Sveitarfélagið Árborg trónir á toppnum yfir öll sveitarfélög landsins með fjölgun upp á 74 stöðugildi. Þessa fjölgun má að stærstum hluta rekja til fjölgunar stöðugilda hjá Heilbrigðisstofnun Suðurlands (HSU) og Lögreglunni á Suðurlandi.

Í Hrunamannahreppi ríflega fjórfölduðust ríkisstörf, úr þremur í fjórtán, í kjölfar opnunar nýrrar heilsugæslu á Flúðum. Þá fjölgaði stöðugildum um sjö í Skeiða- og Gnúpverjahreppi, eða sem nemur ríflega 14%, aðallega í tengslum við starfsemi Landsvirkjunar á svæðinu. Einnig varð ágætis vöxtur í Mýrdalshreppi, Bláskógabyggð, Vestmannaeyjum, Skaftárhreppi og Ölfusi.

Tækifæri til sóknar þar sem dregur saman

Þótt heildarmyndin sé afar björt fyrir Suðurland sýna gögnin einnig samdrátt í ákveðnum sveitarfélögum. Störfum fækkaði í Hveragerði um átta, meðal annars hjá Ási dvalar- og hjúkrunarheimili og Heilsustofnun NLFÍ. Einnig varð samdráttur í Rangárþingi eystra og Rangárþingi ytra, sem skýrist meðal annars af færslu starfa hjá lögreglunni og Umhverfisstofnun. Lítils háttar samdráttur mældist einnig í Grímsnesi og Grafningi ásamt Hornafirði.

Suðurland samt með lægsta hlutfall á landsvísu

Þótt fjölgunin sé afar jákvæð fyrir landshlutann dregur skýrslan einnig fram athyglisverða skekkju sem SASS mun beita sér fyrir að leiðrétta. Suðurland er fjölmennasti landshlutinn utan höfuðborgarsvæðisins en er þrátt fyrir það með lægsta hlutfall ríkisstöðugilda miðað við mannfjölda á vinnualdri. Einungis 7,7% íbúa á vinnualdri á Suðurlandi starfa hjá ríkinu, á meðan hlutfallið er 12% á höfuðborgarsvæðinu og tæp 12% á Norðurlandi vestra. Þetta undirstrikar að þrátt fyrir mikla fólksfjölgun og grósku á Suðurlandi hefur fjölgun ríkisstarfa til lengri tíma ekki haldið í við þá þróun.