Græna kortið fékk styrk úr Uppbyggingarsjóði Suðurlands

Náttúran.is hlaut styrk til að vinna að "Grænu korti" fyrir Suðurland. Markmiðið er að koma út appi sem auðveldar aðgengi að upplýsingum Græna kortsins um Suðurland.

Flokkar á rafrænu útgáfu Græna kortsins á Íslandi eru um 150 talsins og raðast í yfirflokkana Náttúru, Menningu og Hagkerfi. Á kortinu eru upplýsingar um merkilega staði og áhugaverða í náttúrunni. Náttúruvætti, þjóðgarðar og náttúruminjar, friðlönd  og fuglaskoðunarstaðir svo fátt eitt sé nefnt. Í flokki Menningar eru torfbæir, söfn, þjóðleg tónlist, mannvirki og stjórnsýsla. Og undir Hagkerfi eru skráðir þjónsutuaðilar sem á einn eða annan hátt starfa með umhverfisvænum hætti eða stuðla að vænna umhverfi. Þar eru m.a. almenningssamgöngur, veitingar, gisting, orkuframleiðsla, nýsköpun í heimabyggð og svo má lengi telja.

Græna kortið er unnið eftir kerfi Green Map Systems ® sem er upprunnið í New York og notað á um 900 stöðum um allan heim. Markmiðið er að Græn kort stuðli að betri upplýsingum til ferðamanna og heimafólks um umhverfisvæna kosti sem finnast á hverjum stað og stuðli að samvinnu þeirra sem vilja leggja sitt að mörkum til að draga úr mengun, sóun og neikvæðum áhrifum á umhverfið.

Náttúran.is hefur unnið að verkefninu í samvinnu við fjölmarga aðila allt frá árinu 2008 og náð því að verða fyrsta landið sem kortlagt er í heild með þessari hugmyndafræði.Frumkvöðull verkefnisins á alþjóðavísu, Wendy Brawer, er væntanleg til landsins í haust og dagkrá í tegnslum við þá heimsókn verður kynnt síðar. Grænt Íslandskort fyrir Ísland má nálgast á https://natturan.is/gm/ og eru upplýsingarnar á fimm tungumálum.