Til baka í yfirlit
19. janúar 2021
Menntaverðlaun Suðurlands 2020
Menntaverðlaun Suðurlands 2020, sem Samtök sunnlenskra sveitarfélaga veita, voru afhent í þrettánda sinn fimmtudaginn 14. janúar s.l. á árlegum hátíðarfundi Vísinda- og rannsóknarsjóðs Suðurlands. Athöfnin fór fram í fjarfundi og var send út frá Fjölheimum á Selfossi.
Alls bárust sex tilnefningarnar þetta árið:
- Magnús J, Magnússon fyrrverandi skólastjóri Barnaskólans á Eyrabakka og Stokkseyri fyrir starf í þágu leiklistar í skólanum.
- Snjólaug Elín Árnadóttir og Unnur Líf Ingadóttir kennarar við Grunnskóla Vestmannaeyja fyrir frumkvöðlastarfsemi á menntasviði með gerð kennsluefnis sem þær deila með öðrum á vefsíðunni og Facebookhópnum „Út fyrir bókina“.
- Nanna Dóra Ragnarsdóttir, grunnskólakennari við Grunnskóla Hornafjarðar fyrir góða kennsluhætti.
- Hildur Sólveig Sigurðardóttir, sjúkraþjálfari í Vestmannaeyjum fyrir fjölbreytta fræðslu og námskeið með „Leiðarvísi líkamans“.
- Hvolsskóli, fyrir nýsköpunarverkefni á elsta stigi grunnskóla.
- Guðni Sveinn Theodórsson og Ökuland fyrir framúrskarandi metnað í ökukennslu.
Það voru þær Snjólaug Elín Árnadóttir og Unnur Líf Ingadóttir kennarar við Grunnskóla Vestmannaeyja sem hlutu verðlaunin fyrir frumkvöðlastarfsemi á menntasviði með verkefninu „Út fyrir bókina“. Hlutu þær einnig tilnefningar til Menntaverðlaunanna á síðasta ári fyrir sama verkefni. Í rökstuðningi þeirra sem stóðu að tilnefningu þeirra kemur m.a. eftirfarandi fram:
„Út fyrir bókina“ er heimasíða og Fésbókarsíða þar sem þær deila kennsluefni fyrir yngstu bekki grunnskóla sem þær hafa útbúið til að gæða kennsluna lífi, vekja áhuga og koma kennslunni út fyrir bókina. Verkefnin eru hönnuð þannig að þau nálgist áhugasvið barna m.a. í gegnum leik og eru öllum aðgengileg án endurgjalds.Frumkvöðlastarf og nýsköpun af þessu tagi tengir skólastarfið við samfélagið sem er mikilvægt, ekki síst á tímum eins og í dag þegar nemendur dvelja meira heima við þar sem foreldrar og forráðamenn taka aukinn þátt í námi þeirra.
Það var formaður SASS, Ásgerður Kristín Gylfadóttir sem tilkynnti niðurstöður valnefndar. Forseti Íslands, herra Guðni Th. Jóhannesson afhenti svo verðlaunin yfir netið til Snjólaugar Elínar og Unnar Lífar.
