Landsvirkjun styður við Uppsprettu Suðurlands

Landsvirkjun hefur gengið til liðs við nýsköpunarhátíðina Uppsprettu Suðurlands og verður einn helsti bakhjarl hennar. Samkomulag þess efnis var undirritað á dögunum.

Uppspretta Suðurlands verður í Ölfusi dagana 6.–7. nóvember 2026 og er samstarfsverkefni Samtaka sunnlenskra sveitarfélaga, Háskólafélags Suðurlands og Markaðsstofu Suðurlands. Hátíðin er nýr vettvangur á Suðurlandi þar sem frumkvöðlar, fyrirtæki, fjárfestar og almenningur koma saman til að kynna nýsköpun og verðmætasköpun í atvinnulífi landshlutans.

Sjálfbærni, orka og nýsköpun

Aðkoma Landsvirkjunar að Uppsprettunni fellur afar vel að kjarnastarfsemi og stefnu fyrirtækisins sem leggur ríka áherslu á sjálfbærni, orkutengda nýsköpun og jákvæð samfélagsáhrif í nærsamfélagi sínu.

Jóna Bjarnadóttir, framkvæmdastjóri Samfélags og umhverfis hjá Landsvirkjun, segir orkufyrirtæki þjóðarinnar leggja mikla áherslu á að vera góður granni og styðja við verkefni sem hafa jákvæð samfélagsáhrif. „Suðurland gegnir lykilhlutverki í íslenskri orkuvinnslu og við viljum styðja við þá fjölbreyttu verðmætasköpun og orkutengdu nýsköpun sem þar á sér stað. Við leggjum okkur fram um að taka virkan þátt í samfélaginu á starfssvæðum okkar.“

Dóra Björk Þrándardóttir, nýsköpunarstjóri hjá Landsvirkjun, segir samstarfið falla vel að markmiðum Landsvirkjunar um að styðja við verðmætasköpun á Suðurlandi. „Uppsprettan er nákvæmlega vettvangurinn sem þarf til að tengja saman fólk, fyrirtæki og nýsköpun. Verkefni sem leiða saman frumkvöðla, fyrirtæki, fjárfesta og almenning eru einmitt til þess fallin að styrkja nærsamfélagið.“

Lína Björg Tryggvadóttir, verkefnastjóri hjá SASS, fagnar samstarfinu: „Að fá jafn öflugan aðila til liðs við okkur sýnir trúna á sunnlensku atvinnulífi. Saman ætlum við að skapa suðupott þar sem hugmyndir frumkvöðla og atvinnulífs geta orðið að veruleika.“

Hátíðardagskrá: Fjárfestar og almenningur saman

Dagskrá Uppsprettu Suðurlands verður tvískipt, til að hámarka ávinning þátttakenda og gesta.

Sérstakur fagdagur og ráðstefna verða föstudaginn 6. nóvember. Þar verður nýsköpun í brennidepli, ný nýsköpunarstefna Suðurlands verður formlega kynnt og fulltrúar úr viðskiptahraðlinum Startup Landið kynna hugmyndir sínar fyrir fjárfestum og hagaðilum. Sýningin verður opin almenningi laugardaginn 7. nóvember, þar sem Sunnlendingar og aðrir gestir fá tækifæri til að kynnast fyrirtækjum, frumkvöðlastarfi og lausnum af eigin raun.

Tækifæri til að láta ljós sitt skína

Fyrirtæki á Suðurlandi eru nú hvött til að tryggja sér pláss á sýningunni. Uppsprettan býður upp á einstakt tækifæri til að kynna vörur og lausnir fyrir þúsundum gesta, mynda dýrmæt tengsl við fjárfesta og sýna samfélagslega ábyrgð í verki með því að styðja við nýsköpunarumhverfið í landshlutanum.

Nánar um hátíðina hér