UM SJÓÐINN

Uppbyggingarsjóður Suðurlands er samkeppnissjóður. Sjóðurinn hefur það hlutverk að styrkja menningar-samfélags, atvinnuþróunar- og nýsköpunarverkefni, auk annarra verkefna sem falla að sóknaráætlun Suðurlands og stuðla að jákvæðri samfélagsþróun, treysta stoðir menningar, auka samkeppnishæfni landshlutans og stuðla að sjálfbærni og jákvæðum umhverfisáhrifum. Sjóðnum er skipt í tvo flokka; Menning og samfélag og Atvinnuþróun og nýsköpun. Umsjón og ábyrgð Uppbyggingarsjóðsins er hjá Samtökum sunnlenskra sveitarfélaga (SASS). Stjórn SASS fer með hlutverk úthlutunarnefndar samkvæmt samningi um sóknaráætlun Suðurlands. Við mat á umsóknum skipar stjórn í tvö fagráð, eitt fyrir menningu og samfélag og annað fyrir atvinnuþróun og nýsköpun. Fagráðin fara yfir umsóknir og skila tillögum til stjórnar.

ALMENNAR REGLUR OG VIÐMIÐANIR

1. Við mat á umsóknum er tekið mið af þeim upplýsingum sem fram koma í umsókn og meðfylgjandi gögnum. Umsókn skal útfyllt og skilað með rafrænum hætti skv. leiðbeiningum á vef SASS.

Umsókn skal innihalda:
               – skýra verkefnislýsingu
               – verk- og tímaáætlun
               – sundurliðaða kostnaðar- og fjármögnunaráætlun

Umsókn sem uppfyllir ekki lágmarkskröfur er ekki tekin til efnislegrar meðferðar. Við mat á umsóknum skal m.a. líta til þess hvort verkefni stuðli að jafnræði, aðgengi og fjölbreytileika í samfélaginu. SASS áskilur sér rétt til að skilgreina hvort umsókn teljist sem menningar og samfélags - eða atvinnuþróunar og nýsköpunarverkefni.

2. Þeir sem geta sótt um styrk eru lögráða einstaklingar og aðrir lögaðilar með lögheimili á Suðurlandi. Stofnanir, opinber hlutafélög og samtök í meirihlutaeigu ríkis eða sveitarfélaga skulu að jafnaði ekki vera leiðandi aðili í verkefnum er sækja um styrk. Slíkir aðilar geta þó sótt um verkefnisstyrki enda sé í þeim verkefnum fólgið nýnæmi eða samvinna. Einnig geta sveitarfélög eða rekstraraðilar félagsheimila og menningarhúsa sótt um styrki til einstakra verkefna eða viðburða.
   
3. Umsækjendum er heitið trúnaði varðandi umsóknir þeirra en opinberlega er birtur listi yfir styrkþega, heiti verkefna, styrkupphæðir og heildarkostnað verkefna.
   
4. Umsækjandi skal hafa skilað áfanga- og/eða lokaskýrslu vegna fyrri styrkveitinga áður en sótt er um styrk til framhaldsverkefnis eða styrks til nýrra verkefna.
   
5. Verktími eða sá hluti verkefnis sem styrktur er skal að jafnaði ekki standa yfir lengur en í eitt ár. Sé um að ræða langtímaverkefni skal gera grein fyrir áföngum í verkefninu og óska einungis eftir styrk fyrir þeim hluta sem áætlað er að ljúka innan 12 mánaða.
   
6. Að jafnaði er auglýst eftir umsóknum einu sinni á ári og úthlutað í kjölfarið. Heimilt er að auglýsa aftur eftir umsóknum ef sérstakar aðstæður kalla á það. Verkefni sem hlýtur styrk skal vera lokið fyrir 1. desember árið eftir, með frestun að hámarki til 1. júní árið þar á eftir. Verkefnum sem er ólokið innan 12 mánaða, eru felld niður nema ósk um frest hafi borist fyrir þann tíma.
   
7. Greiðslur styrkja skulu almennt vera: a) Styrkir ≤ 1.000.000 kr. 50% greiðist í síðasta lagi miðjan febrúar, 50% við lokaskýrslu b) Styrkir > 1.000.000 kr. 40% greiðist í síðasta lagi miðjan febrúar, 60% við lokaskýrslu. Forsenda útgreiðslna er að innsend áfanga- eða lokaskýrsla hafi verið samþykkt (sjá nánar leiðbeiningar og reglur um skil á áfanga- og lokaskýrslum á vef SASS).
   
8. Þegar úthlutun hefur verið kunngjörð er um að ræða endanlega niðurstöðu. Ekki er hægt að fara fram á endurmat á einstökum umsóknum.
   
9. Með umsókn í Uppbyggingarsjóð staðfestir umsækjandi, með vísan til reglugerðar ESB nr. 1407/2013 um minniháttaraðstoð (de minimis aid), að opinber stuðningur vegna verkefnisins fer ekki yfir 300.000 Evrur samanlagt á þriggja ára tímabili fyrir fyrirtæki, að meðtöldum þeim stuðningi sem hér er sótt um.(sjá frétt frá Stjórnarráði)
   
10. Sé verkefni ekki styrkt að fullu skal verkáætlun endurskoðuð í samráði við SASS. Breyting á verkáætlun getur falist í að vinna einungis hluta verkefnis, hluta verkefnis sem SASS ákveður að styrkja eða gera breytingar á verkþáttum eða fjármögnun til samræmis við upphæð styrkveitingarinnar og markmið verkefnisins. Ekki er gerð formleg krafa um mótframlag. Umsókn skal þó innihalda skýra og trúverðuga fjármögnunaráætlun. SASS getur óskað eftir staðfestingu á fjármögnun áður en samningur er gerður.
    
11. Endurskoðun:
    Úthlutunarreglur þessar skulu endurskoðaðar árlega.
    
12. Úthlutunarnefnd er skylt að eyða umsóknargögnum innan 6 mánaða frá því að úthlutun hefur farið fram.
    
13. Ábyrgð og hæfi:
    Þeir sem sitja í úthlutunarnefnd skulu gæta að hæfisreglum við ákvarðanatöku og víkja sæti ef fyrirliggjandi aðstæður eru til þess fallnar að draga úr trú á óhlutdrægni við val á verkefnum. Við mat á vanhæfi skal hafa til hliðsjónar ákvæði stjórnsýslulaga nr. 37/1993 og 20. gr. Sveitarstjórnarlaga nr. 138/2011. Ef viðkomandi nefndarmaður er starfsmaður stofnunar eða fyrirtækis og umsókn frá starfsmönnum sömu stofnunar eða fyrirtækis er til umfjöllunar, verður að meta hversu náin tengsl eru við þá starfsmenn og/eða yfirmenn viðkomandi stofnunar. Þessi tengsl þurfa ekki nauðsynlega að leiða til vanhæfis. Nefndarmenn eru ábyrgir fyrir því að koma auga á kringumstæður sem skapa þeim vanhæfi við að fjalla um umsóknir.

STYRKHÆFUR KOSTNAÐUR

Einstök styrkveiting úr sjóðnum getur að hámarki verið 2,5 milljónir króna. Umsókn um hærri upphæð en 2,5 milljónir króna telst ekki fullnægjandi samkvæmt úthlutunarreglum og er því vísað frá án efnislegrar meðferðar.
Sérhvert atvinnuþróunar- og nýsköpunarverkefni eða hliðstætt verkefni sama umsækjanda getur að hámarki hlotið styrk í þrjú skipti eða að hámarki 6 milljónir króna á þriggja ára tímabili.

Við úthlutun skal leitast við að tryggja fjölbreytni verkefna og jafna dreifingu styrkja á landsvæðið. Við mat á umsóknum skal jafnframt líta til þess að einstök verkefni taki ekki óhóflega stóran hluta af ráðstöfunarfé sjóðsins.

Eftirfarandi leiðbeiningar fjalla um styrkhæfan kostnað;

LAUN OG LAUNATENGD GJÖLD

Aðeins verður tekinn til greina sá tími sem unnin er í verkefninu. Við mat á vinnuframlagi skal reikna hverja vinnustund á krónur 6.200. Tímaskýrslur skulu haldnar og eru forsenda útgreiðslu.

FERÐA- OG FUNDAKOSTNAÐUR

Gerð skal grein fyrir öllum ferðum með yfirliti, bæði utanlands og innanlands, hver sé tilgangur ferðanna og áætlun um ferðakostnað.

ANNAR STYRKHÆFUR KOSTNAÐUR

Styrkhæfur kostnaður getur meðal annars verið kostnaður vegna þróunar, undirbúnings og upphafs nýrra menningar- og samfélagsverkefna. Styrkir eru hins vegar ekki veittir til almenns rekstrar eða varanlegra fjárfestinga nema sérstaklega sé rökstudd þörf fyrir þær vegna verkefnisin.

AÐKEYPT ÞJÓNUSTA

Í umsókn skal lýsa aðkeyptri þjónustu og af hverjum þjónustan verður keypt. Gera á grein fyrir hvað felst í hinni aðkeyptri þjónustu eða ráðgjöf, hvað þjónustan mun kosta og hver sé hinn skilgreindi afrakstur.

TEKJUR

Ef verkefnið skapar tekjur á verkefnatíma skal gera grein fyrir þeim í áætlun. Þessar tekjur geta til dæmis verið aðgangseyrir á viðburðum, vörusala ofl.

EFTIRFARANDI TELST EKKI TIL STYRKHÆFS KOSTNAÐAR:

1.      Fjárfesting í eignarhlutum í fyrirtækjum, kostnaður við deiliskipulagsvinnu, kaup eða endurbætur á framleiðslutækjum, lóðum eða húsnæði. Almennur rekstrarkostnaður, s.s. hiti, rafmagn og leigukostnaður til lengri tíma. Leyfisgjöld og vottanir.

2.      Kostnaður sem fallið hefur til vegna verkefnisins áður en umsókn var send til SASS.

3.      Skráning menningarminja, skiltagerð, starfsemi íþróttafélaga, bæjarhátíðir eða almennar samkomur (sbr. tónleika eða sýningar án skilgreindrar sérstöðu), almennt safnaðarstarf eða hefðbundið menningarstarf innan skóla. Útgáfa hverskonar, s.s. á rituðu efni, tónlist, myndefni eða töluðu- eða leiknu máli.

MARKMIÐ, ÁHERSLUR OG MATSÞÆTTIR – ATVINNUÞRÓUN OG NÝSKÖPUN

MARKMIÐ STYRKVEITINGA:

•  Að styðja við fjölbreytt og öflug atvinnulíf á Suðurlandi
• Að efla nýsköpun, verðmætasköpun og framleiðniaukningu í atvinnulífi
• Að stuðla að sjálfbærri atvinnuuppbyggingu og aukinni samkeppnishæfni svæðisins
• Að efla þekkingu, þróun og samstarf sem styrkri framtíðaratvinnugreinar á Suðurlandi

ÁHERSLUR STYRKVEITINGA:

• Verkefni sem stuðla að nýsköpun, þróun nýrra vara, þjónustu eða ferla.
• Verkefni sem styðja við markaðssókn og aukna verðmætasköpun í atvinnulífi.
• Verkefni á sviði grænnar orku, hringrásarhagkerfis, sjálfbærni og umhverfislausna.
• Verkefni sem efla matvælaframleiðslu, skapandi greinar, tækniþróun og þekkingariðnað.
• Verkefni sem styðja við nýsköpun og frumkvæði ungs fólks og fyrstu skref í atvinnusköpun.
• Verkefni sem fela í sér samstarf fyrirtækja, stofnana, fræðasamfélags eða sveitarfélaga.
• Verkefni sem stuðla að aukinni þekkingu, rannsóknum eða þátttöku í innlendum og alþjóðlegum samstarfs- og samkeppnissjóðum.
• Verkefni sem hafa jákvæð samfélagsleg áhrif og stuðla að inngildingu og fjölbreyttum tækifærum til atvinnuþátttöku

MATSÞÆTTIR

Við mat á umsóknum er stuðst við eftirfarandi matsþætti og vægi þeirra. Umsóknir eru metnar út frá heildstæðu faglegu mati þar sem litið er til gæða verkefnis, raunhæfni, samfélagslegra áhrifa, nýsköpunar og tengingar við markmið Sóknaráætlunar Suðurlands.

Hver matsþáttur er metinn á einkunnaskalanum 1–10. Einkunn er margfölduð með vægi viðkomandi matsþáttar og samanlögð niðurstaða myndar heildareinkunn verkefnis.

Matsþættir                                                                      Vægi

Lýsing á verkefninu                                                          15%

Verk- og tímaáætlun                                                       10%

Kostnaðaráætlun                                                            10%

Tengsl við Sóknaráætlun Suðurlands                           25%

Samstarf og hæfni                                                           10%

Nýnæmi og/eða nýsköpun                                             15%

Atvinnusköpun                                                                15%

 Verkefni skulu uppfylla markmið og skilyrði viðkomandi flokks Uppbyggingarsjóðs Suðurlands. Umsóknir eru metnar samkvæmt matsþáttum sjóðsins og heildareinkunn ákvörðuð á grundvelli þeirra.

Ef umsókn fær einkunnina 0 í einhverjum af eftirfarandi matsþáttum telst hún ekki uppfylla lágmarkskröfur sjóðsins:

• Lýsing verkefnis, markmið og væntur árangur
• Verk- og tímaáætlun
• Kostnaðaráætlun og fjármögnun

MARKMIÐ, ÁHERSLUR OG MATSÞÆTTIR - SAMFÉLAG OG MENNING

MARKMIÐ STYRKVEITINGA:

• Að efla menningarstarfsemi, listsköpun og skapandi greinar á Suðurlandi.
• Að stuðla að aukinni þátttöku íbúa í menningu og listum, bættu aðgengi að menningarstarfi og eflingu samfélags um allt Suðurland.
• Að styðja verkefni sem efla inngildingu, samvinnu, sjálfbærni, lífsgæði og miðlun menningararfs svæðisins.

MATSÞÆTTIR

Við mat á umsóknum er stuðst við eftirfarandi matsþætti og vægi þeirra. Umsóknir eru metnar út frá heildstæðu faglegu mati þar sem litið er til gæða verkefnis, raunhæfni, samfélagslegra áhrifa, nýsköpunar og tengingar við markmið Sóknaráætlunar Suðurlands.

Hver matsþáttur er metinn á einkunnaskalanum 1–10. Einkunn er margfölduð með vægi viðkomandi matsþáttar og samanlögð niðurstaða myndar heildareinkunn verkefnis.

                Matsþættir                                                                      Vægi

1.      Lýsing á verkefninu                                                          15%

2.      Verk- og tímaáætlun                                                       10%

3.      Kostnaðaráætlun                                                            10%

4.      Tengsl við Sóknaráætlun Suðurlands                            25%

5.      Samstarf og hæfni                                                           10%

6.      Nýnæmi og/eða nýsköpun                                             15%

7.      Menningarlegt  og samfélagslegt gildi                           15%

Verkefni skulu uppfylla markmið og skilyrði viðkomandi flokks Uppbyggingarsjóðs Suðurlands. Umsóknir eru metnar samkvæmt matsþáttum sjóðsins og heildareinkunn ákvörðuð á grundvelli þeirra.

Ef umsókn fær einkunnina 0 í einhverjum af eftirfarandi matsþáttum telst hún ekki uppfylla lágmarkskröfur sjóðsins:

• Lýsing verkefnis, markmið og væntur árangur
• Verk- og tímaáætlun
• Kostnaðaráætlun og fjármögnun