Orka náttúrunnar verður bakhjarl Uppsprettu Suðurlands

Orka náttúrunnar hefur undirritað samkomulag um að gerast formlegur bakhjarl Uppsprettu Suðurlands – hátíðar vaxtar og verðmætasköpunar.
Hátíðin sameinar ráðstefnu, sýningarsvæði og tengslamyndun þar sem frumkvöðlar, starfandi fyrirtæki, fjárfestar, sveitarfélög og almenningur koma saman í Horseday-höllinni í Ölfusi dagana 6. og 7. nóvember 2026.
Að baki Uppsprettu standa Samtök sunnlenskra sveitarfélaga (SASS), Háskólafélag Suðurlands og Markaðsstofa Suðurlands, með það sameiginlega markmið að virkja þann gríðarlega kraft og hugvit sem býr á svæðinu.

Sammerkt sýn á sjálfbærni og verðmætasköpun

Bakhjarlssamningurinn við ON smellpassar við framtíðarsýn Uppsprettu um sjálfbæra atvinnuuppbyggingu. ON er stærsta jarðvarmafyrirtæki landsins og rekur sínar stærstu virkjanir, Hellisheiðarvirkjun og Nesjavallavirkjun, á starfssvæði sunnlenskra sveitarfélaga. Nýsköpun skipar stóran sess í starfsemi beggja aðila. Í Jarðhitagarði ON eru afurðir virkjana fjölnýttar og þar stendur nú yfir þróun og uppbygging á nýsköpunarmiðstöðinni Glóð. Þegar miðstöðin verður tekin í notkun mun hún bjóða sprotafyrirtækjum og frumkvöðlum nýjan vettvang til að stíga sín fyrstu skref og nýta strauma hringrásarhagkerfisins.

Ingunn Gunnarsdóttir, leiðtogi nýsköpunar hjá ON, segir samstarfið rökrétt skref fyrir fyrirtækið. „Við fögnum þessu metnaðarfulla framtaki SASS og samstarfsaðila og erum spennt að styðja við Uppsprettu. Hátíðin fellur vel að áherslum ON um sjálfbæra verðmætasköpun, nýsköpun og öflugt atvinnulíf. Sem atvinnurekandi á svæðinu viljum við bæði efla nýsköpun í eigin starfsemi og styðja við hugmyndir og lausnir annarra, meðal annars í Jarðhitagarði og Glóð, fyrirhugaðri miðstöð nýsköpunar, á Hellisheiði.“

Samstaða um uppbyggingu atvinnulífs

Hjá SASS er lögð mikil áhersla á að leiða saman öfluga aðila landshlutans til að stuðla að framþróun í atvinnulífi svæðisins. Lína Björg Tryggvadóttir, verkefnastjóri hjá SASS, fagnar samkomulaginu og segir það undirstrika mikilvægi hátíðarinnar. „Það er gríðarlega mikilvægt fyrir okkur sem stöndum að þessari hátíð að fá öflugan og leiðandi aðila eins og Orku náttúrunnar til liðs við þetta stóra verkefni. Uppsprettan er hugsuð sem hreyfiafl fyrir allt Suðurland og stuðningur ON sýnir í verki þann kraft og þá samstöðu sem býr í atvinnulífi landshlutans þegar kemur að því að efla nýsköpun í heimabyggð.“

Tveggja daga veisla atvinnulífsins í Ölfusi

Uppsprettan verður fjölbreyttur tveggja daga viðburður þar sem frumkvöðlar, fjárfestar, sunnlensk fyrirtæki og almenningur leiða saman hesta sína í Horseday-höllinni.

Föstudagurinn 6. nóvember er tileinkaður atvinnulífinu með fagráðstefnu, kynningu á nýrri Nýsköpunarstefnu Suðurlands, lokahátíð viðskiptahraðalsins Startup Landið og tengslamyndun. Laugardaginn 7. nóvember verður sýningarsvæðið síðan opnað almenningi og fjölskyldum milli klukkan 11:00 og 16:00, þar sem gestum gefst kostur á að kynnast gróskunni í sunnlensku atvinnulífi og prófa nýjustu lausnir af eigin raun.

Ítarlega dagskrá beggja daga og frekari upplýsingar um viðburðinn má finna á heimasíðu Uppsprettu.