Ný stjórn og starfsfólk SASS stilla saman strengi

Ný stjórn og starfsfólk Samtaka sunnlenskra sveitarfélaga komu saman til vinnufundar á Sveitasetrinu Brú í Grímsnesi 20. ágúst sl. Markmið fundarins var að stilla saman strengi fyrir komandi starfsár, fara yfir stefnumótun landshlutans og undirbúa stór verkefni á borð við nýjan sunnlenskan sveitarstjórnarskóla og komandi ársþing.

Fundurinn markaði formlegt upphaf að samstarfi nýrrar stjórnar og starfsfólks samtakanna. Farið var ítarlega yfir tilgang og hlutverk landshlutasamtakanna sem sameiginlegs vettvangs sveitarfélaganna 15 á Suðurlandi. Þar gegna byggðaþróunarfulltrúar mikilvægu hlutverki í að tengja stefnumótun SASS við atvinnulíf og samfélag heima í héraði. Jafnframt var farið yfir samstarfsverkefni á borð við Sorpstöð Suðurlands, Eignarhaldsfélag Suðurlands og hið mikilvæga forvarnar- og meðferðarúrræði ART teymisins.

Stjórn og starfmenn hlýða á framkvæmdastjóra SASS

Sóknaráætlun í forgrunni

Eitt helsta stjórntæki samtakanna, Sóknaráætlun Suðurlands fyrir árin 2025–2029, var í brennidepli á fundinum. Áætlunin er sértæk byggðaáætlun landshlutans og mikilvægur leiðarvísir að sjálfbærri þróun og uppbyggingu um allt Suðurland. Henni er ætlað að efla samkeppnishæfni, bæta lífsgæði og tryggja blómlegt og samheldið samfélag fyrir alla Sunnlendinga. Sóknaráætlunin byggir á víðtæku samráði við íbúa, atvinnulíf og kjörna fulltrúa og skiptist í fjórar meginstoðir: atvinnu og nýsköpun, samfélag, umhverfi og innviði.

Á fundinum var lögð áhersla á að áætlunin væri lifandi stýritæki sem knýr áfram framþróun í landshlutanum, meðal annars í gegnum Uppbyggingarsjóð Suðurlands og öflug áhersluverkefni.

Lína Björg verkefnastjóri byggðamála fer yfir mikilvægi Sóknaráætlunar Suðurlands

Sveitarstjórnarskólinn og Ársþing SASS

Stór verkefni eru fram undan og var tímanum vel varið í að ræða framkvæmd þeirra. Kynnt voru drög að Sunnlenska sveitarstjórnarskólanum, sem er nýtt fræðslu- og kynningarátak ætlað nýkjörnum sveitarstjórnarfulltrúum á Suðurlandi. Verkefnið felur meðal annars í sér heimsóknir SASS í öll sveitarfélög landshlutans.

Þá var lagt á ráðin um undirbúning fyrir Ársþing SASS sem haldið verður 29.-30. október næstkomandi. Farið var yfir drög að dagskrá, nefndarvinnu, kynningar á áhersluverkefnum og fleira sem viðkemur skipulagningu þingsins.

Vinnufundurinn á Sveitasetrinu Brú þótti einkar árangursríkur og ljóst að mikill hugur er í nýrri stjórn og starfsfólki að vinna ötullega að framgangi og hagsmunum Suðurlands á nýju kjörtímabili.

Hér má sjá lista yfir aðalmenn og varamenn stjórnar SASS