sass@sass.is 480-8200
16. November 2017

Byggðastofnun stendur fyrir málþingi um raforkumál á Íslandi þriðjudaginn 21. nóvember næst komandi í Hofi á Akureyri.  Málþingið hefst kl. 13:00 og stendur til kl. 16:30. Boðið verður upp á léttan hádegisverð frá kl. 12:00.

Umfjöllunarefni er einkum flutningskerfi raforku á Íslandi. Atvinnufyrirtæki víða um land þurfa raforku til starfsemi sinnar, bæði til að fá hreina orku í stað orku sem framleidd er með olíu vegna starfsemi sem þegar er til staðar og eins til að geta aukið við eða farið út í nýja starfsemi. Á vissum svæðum er orkuöryggi ekki nægjanlega tryggt. Endurnýjun flutningskerfis raforku hefur ekki átt sér stað og illa hefur gengið að koma endurnýjun lína eða nýjum línuleiðum í gegnum umsóknarferli og á framkvæmdastig. Þessi staða kemur niður á atvinnulífi, ekki síst í landsbyggðunum.

Skiptar skoðanir eru um hvar raforkulínur eigi að vera, hvort fara eigi um byggð eða yfir hálendið og hvort leggja eigi loftlínur eða jarðstrengi svo dæmi séu nefnd.

Byggðastofnun vill skapa umræðuvettvang þar sem aðilar sem hafa látið sig málið varða koma saman og gera grein fyrir sinni sýn á málin. Fulltrúar Orkustofnunar, Landsnets, Skipulagsstofnunar, Akureyrarbæjar, Ísfélags Vestmannaeyja, Landverndar og landeigenda munu hafa framsögur. Að framsögum loknum verða almennar umræður.

Dagskrá má sjá hér

Frétt fengin af vef Byggðastofnunnar